مقالات

freelancing

يعنى إيه Freelancing، وإزاي أبقى فريلانسر؟
بداية الفريلانسنج هو طريقة لممارسة مجالات العمل، لكن هو مش مجال عمل.يعني أنا مثلًا لما حد يسألني شغالة في مجال إيه، مينفعش أقوله شغالة “فريلانسر” لأ أنا شغالة كاتبة/ مصممة/ مطورة ويب، ودي مجرد أمثلة، لكن أنا فريلانسر يعني بشتغل في المجالات بشكل حر، مش موظف في شركة، مفيش فوقي مدير، بتعامل مع العميل بشكل مباشر في شغل محدد بوقت وسعر، دا باختصار شديد..
– أنا في كلية كذا، هل ممكن ألاقي شغل فريلانسنج في مجالي؟
أيا كان مجالك فبنسبة 99.99% هيبقى متاح تلاقي شغل على مواقع العمل الحر في مجالك، أو قريب من مجالك جدا، يعني أنت لو مهندس فقدامك تشتغل في برامج التصميم الهندسي، في حاجة تخص اللغات فقدامك شغل الترجمة والتدريس والتفريغ الصوتي والمراجعة اللغوية وليلة سعادتك 😀 .. لو في كلية حقوق مثلًا فبرضه في مواقع ممكن تقدم عليها استشارات قانونية والأمثلة كتير مبتخلصش.. فالفكرة إن أنت متسألش ممكن ألاقي شغل في مجالي، ادخل على المواقع على طول وشوف بنفسك، هتفضل المعلومة اللي بتكتشفها بتجربتك أكثر ثقة وأضمن من تجارب الغير..
طيب هندخل نشوف المواقع بنفسنا، فالسؤال هنا إيه هي أشهر مواقع العمل الحر؟
– Fiverr: https://www.fiverr.com
ودا بعتبره أفضل موقع للمبتدئين، لأن التسجيل فيه بسيط نسبيًّا ومش بتستنى الأكونت يتقبل وما إلى ذلك، ولأنه قائم على فكرة الخدمات المصغرة اللي بتبدأ من 5$ بس، هي بتبدأ ب5$ كحد أدنى بس مفيش حد أقصى يعني مش زي ما هو شائع إن كل الخدمات عليه ب5$، وأنت اللي بتحط الخدمة اللي هتقدر تقدمها والعميل هو اللي بيكلمك ودا شيء مريح للأعصاب، وقبل ما تبدأ على الموقع ممكن تدور على شرح لفكرته على اليوتيوب.
– خمسات: https://khamsat.com/
ودا النسخة العربية من Fiverr.. ونفس فكرته، لكن بيظل فايفر أكثر احترافية، والدعم بتاعه محترم عن خمسات بطبيعة الحال.. ودا ميمنعش إننا نجرب.
– على ذكر خمسات نروح لموقع مستقل: https://mostaql.com، والتابع لنفس الشركة بتاعته وبتدخل عليهم الاتنين بحساب واحد، ومن خلال تجربة شخصية فمستقل أكثر احترافية من خمسات برضه.
– Upwork: https://www.upwork.com
طبعًا مفيش خلاف على احترافية الموقع وإن عليه فرص كتير وهايلة، لكن لو أول مرة تبدأ على مواقع الفريلانسنج، فهيبدو بالنسبة لك موقع معقد شوية وباستمرارية الدخول على الموقع والتعامل هتبقى الدنيا بسيطة، وأنت بتسجل الأكونت بتاعك غالبًا هيترفض لو عملت العنوان مصر، اعمله روسيا وغيّره بعد ما يتقبل، لكن دي مجازفة ومش شيء قانوني وممكن الأكونت يتقفل في أي لحظة.. بس طريقة ناجحة عامة 😀
– PPH: https://www.peopleperhour.com/
موقع لطيف متاح فيه شغل بالساعة أو بالمشروع الكامل، ودي نفس آلية عمل Upwork بالمناسبة.
– Guru: https://www.guru.com/
الموقع سمعته لطيفة لكن مجربتوش فهنسيبه للناس اللي جربته تكلمنا عنه 😀
– Freelancer: https://www.freelancer.com
ودا كان من أكتر المواقع المتصدرة الأول، لكن حاليًا الهنود شبه محتكرينه، وفي ناس كتير تعرضت لتجارب احتيال ونصب عليه، فلازم تخلي بالك لو هتشتغل عليه وتفهم طريقة عمل الموقع كويس، وأي موقع مش فريلانسر بس.
دي تقريبًا أشهر مواقع العمل الحر، في مواقع كتيرة جدا، في مواقع متخصصة في مجالات محددة، لو أنت فريلانسر بالفعل قولنا بتشتغل على موقع إيه في التعليقات.
– نيجي للسؤال الأشهر: أنا معنديش حساب بنكي ولا فيزا ولا أي حاجة ممكن أسحب بيها فلوس، ممكن أبدأ بعدها أشوف حل؟
الإجابة طبعًا تبدأ.. أول ما هتبدأ هتلاقي كل حاجة بتجيب بعضها، طرق السحب كتيرة ومتنوعة وهتلاقي حاجة تناسبك فيها آكيد فمتقلقش.
– السؤال العالمي بقى:
أنا معنديش أي مهارة! أشتغل إيه؟
يا شيخ مفيش أي مهارة؟ مبتعرفش تكتب على الكيبورد؟ وبمناسبة الكيبورد ففي مجال من أكتر المجالات المتوفرة في سوق الفريلانسنج ألا هو “إدخال البيانات-Data entry” ومتفرع منه مجالات كتيرة، أشهرها التفريغ الصوتي وهو إنك بتسمع فيديو أو أوديو وتكتبه على برامج زي الـ Word.. ودا مش مجال ملوش قواعد عشان تبقى فاهم، لكن الفكرة إنه قواعده سهلة ممكن تتعلمها في وسط ما أنت بتشتغل بالفعل.
بالمناسبة معظم اللي بيقولوا معندناش مهارة ولا في مجال ينفعنا بيكون عندهم بس مخبينه جوا.. قصدي مش واخدين بالهم من مهاراتهم 😂
تقريبًا كدا دي معظم الأسئلة اللي بتتسأل..
بالتوفيق جميعًا

شاهد أيضاً

إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock